FCSB ka arritur ta mposht Dritën me rezultat 3-2 pas një rikthim senzacional në “Arena Nationala” të Rumanisë, ku gjilanasit ishin duke fituar 0-2.

Pas ndeshjes i pari i klubit rumun, Gigi Becali foli për media, ku njihet për deklarata e tij të “forta”, shkruan Arbresh.info.

Por këtë herë Becali, ishte më i rezervuar. Ai ishte i kënaqur me fitoren.

“Më pëlqeu karakteri i ekipit, pasi është skuadër me të cilën po filloj të kem sukses. Thashë se edhe 2:2 ishte rezultat i mirë për ne, por nuk u dorëzuam dhe fituam në fund”, është shprehur Becali.

Tutje ai është i bindur që do kalojnë tutje si dhe bëri krahasimin e Shkëndijes me Dritën.

“Normalisht që do të kalojmë tutje, duke marrë parasysh ekipin dhe rezultatin, njëqind për qind. E shihni? Thashë ‘normalisht’. Më parë mburresha, por tani, pas asaj që ndodhi me Shkendijën, nuk do ta them më kurrë. Shkendija ishte vërtet e dobët. Drita nuk është aq e dobët”, shtoi Becali.

Drita dhe FCSB ndeshjen e ardhshme e luajnë të enjten në “Fadil Vokrri” me fillim nga ora 20:00./Arbresh.info